গোলাপ ফুলৰ কীট-পতঙ্গ, ৰোগ আৰু পুষ্টিহীনতা আৰু ইয়াৰ নিয়ন্ত্ৰণ
কীট-পতঙ্গ আৰু ইয়াৰ নিয়ন্ত্ৰণ
১। মোৱা পোক (Aphid):
ক্ষতিৰ লক্ষণ:
- পোৱালি আৰু প্ৰাপ্তবয়স্ক মোৱাপোকবোৰ কুমলীয়া আগলি কোঁহ, কলি, ফুল আদিত থুপ পাতি ৰস শোহে
- কোমল কোঁহবোৰ শুকাই যায়
- কলিবোৰ অকালতে সৰি যায় আৰু ফুলবোৰ শেতা হৈ পৰে
নিয়ন্ত্ৰণৰ দিহা:
- নিমতেল- প্ৰতি লিটাত পানীত ৫ মিলিলিটাৰ মিহলাই স্প্ৰে কৰিব লাগে
- ৰাসায়নিক নিয়ন্ত্ৰনৰ বাবে Dimethoate- প্ৰতি লিটাত পানীত ২ মিলিলিটাৰ মিহলাই স্প্ৰে কৰিব লাগে
২। পাত ওকনি (Thrips):
ক্ষতিৰ লক্ষণ:
- পোৱালি আৰু প্ৰাপ্তবয়স্ক পোকবোৰে পাতৰ তলপিঠিৰ পৰা ৰস শোহে
- আক্ৰান্ত পাতত ৰূপালী বা বগা ৰঙৰ আঁচ দেখা যায়
- আক্ৰান্ত ফুলবোৰ মেল নেখায়, ৰং শেতা হৈ পৰে আৰু কলিতে সৰি পৰে
নিয়ন্ত্ৰণৰ দিহা:
- নিমতেল- প্ৰতি লিটাত পানীত ৫ মিলিলিটাৰ মিহলাই স্প্ৰে কৰিব লাগে
- ৰাসায়নিক নিয়ন্ত্ৰনৰ বাবে Dimethoate- প্ৰতি লিটাত পানীত ২ মিলিলিটাৰ মিহলাই স্প্ৰে কৰিব লাগে
৩। চোকোৰা পোক (Scale Insect):
ক্ষতিৰ লক্ষণ:
- ডালবোৰ সম্পূৰ্ণকৈ আৱৰি ধৰে
- আক্ৰান্ত অংশবোৰ শুকাই যায়
- বেছিকৈ আক্ৰান্ত হলে সম্পূৰ্ণ গছজোপা মৰি যায়
নিয়ন্ত্ৰণৰ দিহা:
- আক্ৰান্ত ডালবোৰ কাটি পুৰি পেলাব লাগে
- ডিজেল বা কেৰাচিন তেলত ভিজাই লোৱা কপাহেৰে চোকোৰা পোকবোৰ ঘঁহি এৰুৱাই দিব লাগে
- Malathion-50EC- প্ৰতি লিটাৰ পানীত ২ মিলিলিটাৰকৈ মিহলাই স্প্ৰে কৰিব লাগে।
৪। ৰঙা চাঁহি মকৰা (Red Spider Mite):
ক্ষতিৰ লক্ষণ:
- পাতৰ তলপিঠিত ৰস শোহে আৰু আঁহেৰে জাল বান্ধে
- পাতৰ ওপৰফালে হালধীয়া ফোঁট দেখা যায় আৰু ৰস শোহি খোৱাৰ ফলত পাতখিলা ৰঙচুৱা হৈ পৰে
- আক্ৰান্ত পাতবোৰ সৰি পৰে
- গছৰ বৃদ্ধি আৰু ফুল ধৰাত ব্যাঘাট জন্মে
নিয়ন্ত্ৰণৰ দিহা:
- Spray dicofol- প্ৰতি লিটাৰ পানীত ২ মিলিলিটাৰকৈ মিহলাই স্প্ৰে কৰিব লাগে বা Wettable Sulphur- প্ৰতি লিটাৰ পানীত ২ গ্ৰামকৈ মিহলাই স্প্ৰে কৰিব লাগে।
৫। পাত কটা বৰল (Leaf Cutter Bee):
ক্ষতিৰ লক্ষণ:
- গোলাপ ফুলৰ পাতবোৰ বিশেষ ধৰণে কাটি অনিষ্ট কৰে
- পাতৰ কাষৰ পৰা বৃত্তকাৰ বা অৰ্দ্ধ-বৃত্তাকাৰ আঁকাৰত কাটে
নিয়ন্ত্ৰণৰ দিহা:
- বৰলবোৰ ফুলত পৰিব নোৱাৰাকৈ জালেৰে ঢাকি দিব লাগে
- বৰলৰ বাহবোৰ আঁতৰাব লাগে
ৰোগ আৰু ইয়াৰ নিয়ন্ত্ৰণ
১। পাতত ক’লা দাগ (Black Spot):
ক্ষতিৰ লক্ষণ:
- পাতত ক’লা দাগ হয়, যিবোৰৰ চাৰিওফালে হালধীয়া হয়। আক্ৰান্ত পাত সোনকালেই সৰি পৰে
- প্ৰথম বছৰত বেঙুনীয়া নাইবা ৰঙা ৰঙৰ ঠাল মেলে
- পাত সৰি পৰাৰ ফলত গছজোপা নিশকতীয়া হয় আৰু ফুলৰ উৎপাদন কমি যায়
নিয়ন্ত্ৰণৰ দিহা:
- গোলাপ ফুলৰ খেতি ৰ’দ পৰা ঠাইতহে কৰিব লাগে য’ত বেলিৰ তাপত ৰাতিৰ নিঁয়ৰৰ কণিকাবোৰ সোনকালে যাতে শুকাই যায়
- গোলাপ ফুলৰ খেতিৰ মাজত বায়ু চলাচল কৰিব পৰাকৈ গছবোৰৰ মাজত যথেষ্ট ব্যৱধান থাকিব লাগে
- ওপৰৰ পৰা পানী দিব নেলাগে; পাতবোৰ যিমান পাৰি সিমান শুকানকৈ ৰাখিব লাগে
- আক্ৰান্ত ঠাল আৰু পাতবোৰ আঁতৰাই পুৰি পেলাব লাগে
২। পাতত বগা পাউদাৰ নিচিনা ভেঁকুৰ লগা (Powdery Mildew):
ক্ষতিৰ লক্ষণ:
- কুমলীয়া পাত, ডাল আৰু কলিত কজলা-বগা ৰঙৰ পাউদাৰৰ নিচিনা ভেঁকুৰ হয়
- আক্ৰান্ত পাতবোৰ বিকৃত হয়, কিছুমান পাত সৰে
- কলিবোৰ মেলাত অসুবিধা হয় আৰু নিম্ন মানদণ্ডৰ ফুল হয়
- ছাঁ-পৰা ঠাইত আৰু ঠাণ্ডাৰ সময়ত এই ৰোগ বেছিকৈ হয়
নিয়ন্ত্ৰণৰ দিহা:
- সৰি যোৱা বেমাৰী পাতবোৰ গোটাই পুৰি পেলাব লাগে
- Wettable sulphur 0.3% - প্ৰতি লিটাৰ পানীত ৩ গ্ৰামকৈ বা Carbendazim 0.1% - প্ৰতি লিটাৰ পানীত ১ গ্ৰামকৈ মিহলাই ১৫ দিনৰ মূৰে মূৰে ২-৩ বাৰ স্প্ৰে কৰিব লাগে
৩। আগ শুকাই মৰি যোৱা (Die-back):
ক্ষতিৰ লক্ষণ:
- গোলাপ ফুলৰ ডালবোৰ আগলিৰ ফালৰ পৰা তললৈ মৰি শুকাই যায়
- আগবোৰ ক’লা পৰি যায়
- ৰোগটো শিপালৈকে বিয়পে আৰু গছজোপা সম্পূৰ্ণকৈ মৰি যায়
নিয়ন্ত্ৰণৰ দিহা:
- আক্ৰান্ত বেমাৰী ঠাল-ঠেঙুলিবোৰ কাটি চাফা কৰি আঁতৰাই পেলাব লাগে আৰু কটা অংশত ট্ৰাইক’ডাৰমা ভিৰিদি ভেঁকুৰনাশকৰ মলম সানি দিব লাগে
৪। মামৰে ধৰা (Rust):
ক্ষতিৰ লক্ষণ:
- পকা নেমুৰ হালধীয়া ৰঙৰ নিচিনা ফোঁহা কিছমান পাতৰ তলপিঠিত আৰু ডালত দেখা যায়, পিছত ৰঙটো ক’লা-ৰঙচুৱা বৰণৰ হয়
- আক্ৰান্ত পাতবোৰ হালধীয়া হৈ মেটুৰা-মেটুৰী হয় আৰু সৰি পৰে
- আগ মৰি শুকাই যোৱা নিচিনা হয়
নিয়ন্ত্ৰণৰ দিহা:
- সৰি যোৱা বেমাৰী পাতবোৰ গোটাই পুৰি পেলাব লাগে
- Wettable sulphur 0.3% - প্ৰতি লিটাৰ পানীত ৩ গ্ৰামকৈ স্প্ৰে কৰিব লাগে
পুষ্টিহীনতা আৰু ইয়াৰ সংশোধন
১। ফচফৰাচ মৌলৰ অভাৱ:
- পুলি ৰোৱাৰ আগতেই মাটিত অনুমোদিত হাৰত একক চুপাৰ ফচফেট সাৰ প্ৰয়োগ কৰিব লাগে নাইবা ৰক ফচফেট প্ৰয়োগ কৰিব লাগে
২। পটেছিয়াম মৌলৰ অভাৱ:
- পটেছিয়াম চালফেট (K2SO4) প্ৰতিলিটাৰ পানীত ১০ গ্ৰামকৈ ১৫ দিনৰ মূৰে মূৰে পাতত স্প্ৰে কৰিব লাগে
৩। মেগনেছিয়াম মৌলৰ অভাৱ:
- মেগছিয়াম চালফেট (MgSO4) প্ৰতিলিটাৰ পানীত ১০ গ্ৰামকৈ পাতত ২ সপ্তাহৰ মূৰত স্প্ৰে কৰিব লাগে বা মাটিত ২.৬৭ কিলোগ্ৰাম মেগছিয়াম চালফেট (MgSO4) প্ৰয়োগ কৰিব লাগে
